Orioko saregileak omendu dituzte Balearen Egunean

[flickr_set id="72157668380317415"] Orioko Saltxera Feminista taldeak herriko saregileak omendu ditu gaur eguerdian Balearen Egunean. Modu horretan mendetan zehar isilpean egon den emakumeen lana aitortu nahi izan dute, eta nabarmendu dute Orioko ondare arrantzalearen atzean emakume askoren lana dagoela. Herriko hainbat saregile oholtza gainera igo dira, eta Rosi Lazkanok beren omenez sortutako bertsoak abestu dizkie. Saregile elkarteko lehendakari Inma Peirok eskerrak eman dizkio Saltxerak taldeari egindako aitorpenagatik. Gainera, oholtza gainera igo diren saregileak banan banan aipatu ditu, eta bertan izaterik izan ez dutenak gogora ekarri ditu.

Emakume Saregileei bertsoak

Mila bederatzirehun ta lehenengo urtian, nahiz ez ditugun hartu aintzat gaur artian, emazte eta amak ez lanan faltian gizonezkok arrantzan ziren bitartian

Bost ume egindako hamaika emazte, aita ikusi gabe igual lau-bost aste, etxean zeukatenak zeregin hainbeste moilara joaten ziren deitu bezain laiste

Pisuz ez ziren mila ta berrehun arrua, hola ere nola ez xamurtu barrua, aitortzea ez denez ekintza harrua har dezatela gure txaloen orrua

Hau horrela ez bada herriari galde, zenbat lan egin zuten goiz ta arratsalde bale haren arrantzak zituen bi alde eta gu gaude biei kantatzean alde

Egilea: Rosi Lazkano