Orio .3.iruten Hezkuntza Jardunaldia antolatu dute Orion

Orioko Curriculumak ekimen mordoa antolatu zituen 2014an, tartean zutabe margoketa. (Iturria: Karkara) Orioko Curriculuma Sortzen taldeak antolatzen duen hirugarren hezkuntza jardunaldia izango da aurtengoa eta Orio.3.Iruten. “Hiru iruten...” ahoskera borobila baliatuz, "Orioko Curriculuma sortzeko prozesua bera ere borobildu nahi dugu, herriko hezkuntza esparruan egin dugun ekarpenari merezi duen amaiera eman eta aurrera begirako erronkak azaltzeko" azaldu dute antolatzaileek. Herritarrei, jarduera ezberdinetan parte-hartzeko gonbita zuzena luzatu die taldeak: zahar, gazte, irakasle, okin, arrantzale, saregile, dantzari zein arraunlari, "guztiok izango duzue Orioko Curriculumeko txostenak ixten hasi aurretik kontatzeko zerbait, ziur!" Jardunaldien baitan antolatu dituzten ekimenez kanpo ere zerbait esan, kontatu edo bidali nahi dutenek oriokocurriculuma@gmail.com helbidera lasai idaz dezaketela jakinarazi dute Orioko Curriculuma Sortzen taldeko kideek.  

EGITARAUA

APIRILAK 18

Orioko historiaz gosari-tertulia.  Giza eta Gizarte Zientzien arloko txostena itxi aurretik, dokumentuari azken astindua eman nahi dio Orioko Curriculuma Sortzen taldea herritarrekin batera. Arloan lagundu diguten herriko adituak eta interesa duen herritar oro kafe beroa eta galleten bueltan bildu nahi dituzte. Tertulian parte-hartzeko, kultur etxean eman behar da izena apirilaren 15a baino lehen.

 

APIRILAK 20 / 27

Orioko musika irakaskuntzaz hausnarketa saioak. Danbolin Musika Eskola eta ikastetxeetako musika irakasleen arteko saioak. Herriko musika irakaskuntzaren dinamikak aztertuko dira eta aurrera begira, elkarlanerako aukera berriak bilatu.

 

MAIATZAK 9

Natur Zientzien arloaz bizikleta martxa. Eneritz Odriozola eta Garbiñe Manterolaren gidaritzapean, herriko txoko ezberdinak bisitatuko dituzte Natur eta Osasun Zientzien arloko txostenari azken astindua emateko.

 

EKAINAK 12

Orioko Curriculumaren aurkezpen ekitaldia eta lunch-a. Behin behineko Orioko Curriculuma aurkeztuko dute,  eta proiektuak nazio mailan izan duen oihartzunaren berri ere emango da ekitaldian. Ikasturte honen amaieran, Orioko Curriculuma Sortzen Kultur Elkarteak Ijitoen Akordioa sinatzean harturiko kompromezua beteko du: Orioko Curriculuma definitzea, berau herriko hezkuntza eragileen esku utziz, aplikatu, erabili, garatu... dezaten.