Gurutz Larrañaga Kultura sailburuorde ohi azkoitiarra dago 'De Miguel auziko' epaituen artean

Zortzi urteren ostean, atzo hasi zen De Miguel auziaren ahozko epaiketa Arabako Lurralde Auzitegian. Akusatuen eserlekuan eseri dira Arabako ustezko ustelkeria kasu batekin lotutako 26 auzipetuak. Auzipetu horietatik 20 EAJko kargudun ohiak dira. Horien artean dago Gurutz Larrañaga (Azkoitia, 1947) Kultura sailburuorde izandakoa. Hain zuzen ere, 2003ko uztailetik 2009ko maiatzera izan zen azkoitiarra sailburuorde, Juan Jose Ibarretxeren Gobernuan. Fiskalak 17 urteko kartzela zigorra eskatzen du harentzat, ustez Francisco Javier Sanchez Robles sasoi hartako Gazteria eta Jardun Komunitarioko Sailaren zuzendariaren jarduna ez kontrolatzeagatik. Iruzur kasuan legez kanpo kolaboratzea leporatzen dio fiskalak, eta, horregatik, 18 hilabeteko espetxe zigorra eskatu harentzat. Horrez gain, Eusko Jaurlaritzako Kultur departamenduko kontratazioetan iruzur egitea ere egozten diote (3 urte); eta funts publikoa bidegabe erabiltzea (5 urte), dokumentu publikoak 5 urte) eta merkataritza agiriak faltsutzeagatik (2 urte eta 6 hilabete) ere ezarri diote zigor eskaera. Bestalde, Fiskaltzak 1,5 milioi euroko bermea ezartzea ere galdegin dio Larrañagari. Fiskalak, guztira, 439 urteko espetxe zigorra eskatu du akusatuentzat, besteak beste, eroskeria, dirua zuritzea eta prebarikazioa leporatuta. Atzo hasitako epaiketa da ustezko iruzurragatik Euskal Autonomia Erkidegoan sekula egin den handiena. Luze joko du epaiketak, 26 akusatuez aparte, 150 lekukok eta 20tik gora perituk parte hartuko baitute auzi saioetan. Auzipetuen deklarazioak otsailaren 19tik aurrera izatea aurreikusten dute, nahiz eta defentsak epaiketaren amaieran izatea eskatu duen. De Miguel auziak eztanda egin zuenean, Iñigo Urkullu zen EBBko burua, eta hark horrela eskatuta karguak laga eta EAJko kide izateari utzi zioten akusatuek.