Azkoitiko Ibarmia enpresan langile bat larri zauritu dela jakinarazi du LABek

LAB sindikatuak jakinarazi duenez, azpikontratatutako langile batek istripua izan zuen Ibarmia enpresan joan den astelehenean. Urola Kostako Hitzak jakin ahal izan duenez, 35 urteko langile mutrikuarra "oso larri" dago. LABek adierazi du lau metroko altuera batetik erori zela behargina, eta Betelu enpresako langilea zela izatez. Hitza harremanetan jarri da Ibarmia enpresarekin, baina ez dutela hitz egingo jakinarazi dute enpresakoek. LABek, bere aldetik, "elkartasuna eta besarkada beroa" adierazi dizkio zauritutako langileari, haren familiari eta gertukoei eta gainerako langileei. LABek istripua "isilean eta ezkutuan gorde izana" salatu du. "Ibarmia Adegiko presidenteordearen enpresa da, eta Adegiko ordezkari nagusiak dira isiltasunaren konplize nagusiak. Zergatik isilean gorde? Zerbait ari dira ezkutatzen edo manipulatzen?". Horrez gain, "patronalak gertakari hauen aurrean duen ardura" nabarmendu du sindikatuak: "Larriena dena da patronalak, Adegik eta Confebaskek modu lotsagarrian errepideko eta laneko istripuak berdintzea, zorigaitzaren ondorio balira bezala. Laneko istripuen aurrean badaude erantzuleak, ikerketaz ikerketa ikusten den moduan, ez da zorigaizto edo zorte kontua". Horrez gain, zauritutako langilea azpikontratatuta egoteari ere eman dio garrantzia LABek, eta esan du prekarietatearen "oinarrizko osagai" dela azpikontratazioa, "eskubide eta prebentzio neurrien faltarekin, erritmo azkarrarekin, presioarekin, koordinazio eta kontrol neurrien faltarekin batera". Sindikatuko kideek adierazi dute azpikontratazioak "gutxi batzuen irabaziei" egiten diela mesede. "Nazka-nazka eginda" daudela ere salatu dute. "Nazkatuta gaude eredu honek ekartzen dizkigun ondorioez, egoera honen erantzuleen mezu eta hitz lotsagarriekin, langileen osasunaren eta bizitzaren aurretik mozkin eta irabaziak lehenestearekin". LABek gertatutakoa argitzeko beharrezkoak diren ikerketa egiteko eta neurriak hartzeko eskatu die erakundeei, ikuskaritzari, Osalani eta Lan Delegaritzari, "behar bezalako prebentzio politika ezarri eta kontrola dezaten". Sindikatuak adierazi du "beharrezkoa" dela eredu aldaketa, "langileon osasuna eta bizi eta lan baldintzak lehentasunezkoak izango dituen eredu ekonomikora eta sozialera bidean".