Azkoitiko lantegiari ez dio eragiten Sidenorren bost urterako egin duten esparru akordioak

Sidenor enpresako zuzendaritzak CCOO, UGT, USO eta CSI-F sindikatuekin esparru akordioa adostu duela jakinarazi du gaur, asteazkena. Langileek berretsi beharko dute orain adostutako esparru akordioa, baina, onartzen badute, urtarrilean jarriko dute indarrean eta 2021era artekoa izango da. Akordio horrek eragingo die Basauriko, Gasteizko eta Reinosako altzairutegiei eta Basauriko bulego nagusiei. Azkoitiko lantegiari ez dio eragingo; izan ere, lantegi horretan 2018ra arteko hitzarmen propioa dute. Esparru akordioa tarteko, horrek eragiten dien lantegietan hainbat neurri hartuko ditu datozen bost urteetan Sidenorrek. LAB eta ELA sindikatuek ez dute begi onez hartu akordioa. Izan ere, LABek azaldu du hitzartu dutena ez dela sinistekoa. "Ez da sinestekoa langileen lanaldia aldi baterako, batez beste, %50 murrizteko akordioa sinatu duen enpresak lan baldintzak arautzeko akordioan lan orduak ikaragarri handitzea". LABek jakinarazi duenez, esparru akordioa tarteko, 2021era artean bost lan egun gehiago izango dituzte beharginek; formakuntzarako beste 8 ordu egingo dituzte; eta lan aldia igotzeko 72 ordura arteko malgutasuna izango dute. Sindikatuak dioenez, "%13tik gorako langabezia tasa dugun honetan, gustu txarreko inozentada dirudi, baina ez, egiazkoa da". "Bost urteko lanaldia adostu dute, bost urtetan zuzendaritzak nahi duena egiteko, soldata igoera baxu batzuen truke. Gogoratu nahi dugu Sidenorrek %5 jaitsi zituela soldatak 2013an".

LABek salatu du adostu berri duten aldi baterako Lana Erregulatzeko Txostenarekin 72 lanpostu desagertuko direla, gutxienez. "Disponibilitatea erabiltzen badu, 181 lanpostu desagertuko lirateke". Sindikatuko kideen arabera, hori ezin da ulertu, oraintxe Lana Erregulatzeko Txostena onartu dutenean: "Eta are gutxiago ulertzen dugu sindikatu batzuk akordioa sinatzeko prest egotea". Akordioa "antisindikala" dela esan dute, "lantokiaren etorkizunaren inguruko bermerik ezartzen ez delako, eta langileek soldatarekin enpresa finantziatzeaz gain, lan gehiago egin beharko dutelako". Horrez gain, akordioa "antisoziala" dela dio LABek, "enplegua desagerrarazten duelako".

ELAri "kezka handia" sortzen dio prozesuan enpresak "inolako" konpromisorik hartu ez izanak "geroari dagokionez". Sindikatuaren arabera, Sidenorrek ez du inbertsiorik agindu, ez industria planik zehaztu, ezta lan baldintza okerragoak izango dituzten langileen etorkizuna bermatu. ELAk salatu du astebeteko epean berretsi behar dela akordioa, enpresak eta akordioa sinatu duten sindikatuek hala erdietsi dutelako. "Langileen zati handi bat oporretan dela baliatu nahi da, ezkutuan eta langileei bizkar emanda sortu den akordioa berresteko". ELAk esan du "oso larria" dela Sidenorren gertatzen ari dena.

Agerikoa da Sidenorren egoera ez dela onena. Izan ere, abenduaren 8an lortu zuen enpresak aldi baterako Lana Erregulatzeko Txostenaren gaineko akordioa UGT, CCOO, LSB eta CSI sindikatuekin (enpresaren ordezkaritzaren %76 dute horiek). Hori dela-eta, hainbat neurri aplikatuko dituzte enpresako lantegietan; tartean, Azkoitikoan. LAB, ELA eta ESK sindikatuek ez zuten sinatu akordioa. Bi urterako Lana Erregulatzeko Txostenak lantegietako jarduna, batez beste, %50era murriztuko du. Azkoitiko lantegiaren kasuan, lan orduak %62 murriztuko dituzte. Duela hamar egun hasi zituzten Sidenor enpresako zuzendaritzak eta haren lantegietan ordezkaritza duten sindikatuek Lana Erregulatzeko Txostena (LET) negoziatzeko bilerak, eta gaur, osteguna, sinatu dute akordioa.