Badator otsoa!... baina era dibertigarrian oraingoan

Juanma Alvarez eta Ainhoa Agirre, 'Peru eta otsoa'ko pasarte batean. (Didau Antzerki Faktoria) Otsoa. Haurrengan beldur handienetakoa sortzen duen animalia da. Mila eta bat ipuinetan protagonistaren aurkari ankerra. Baina badira beste era bateko otsoak, baita dibertigarriak ere. Adibidez, Peru eta otsoa antzezlanean ikus daitekeena. Didau antzerki faktoriak sortutako antzezlan hori igandean ikusi ahal izango da Zumaiako Aita Mari aretoan, 12:00etatik aurrera. Sarrerak aurrez salgai daude Zumaiako Turismo Bulegoan, 3 eurotan; 2 eurotan Gazte Txartelarekin edo Aita Mari lagun izanda. Antzezlana Serguei Prokofiev konposatzaile errusiarrak 1936. urtean aurkeztu zuen sinfonia baten moldaketa da. Moskun estreinatu zenean ez zuen arrakasta handirik izan, baina, hala ere, belaunaldiz belaunaldi pasatu da eta gaur egunera arte hainbat moldaketa izan ditu. Walt Disneyek marrazki bizidunetara eraman zuen 1946. urtean eta 1978an David Bowie handiak narratzaile lanak egin zituen urte hartan ateratako disko batean. Igandean Zumaian ikusi ahal  izango den antzezlana Zarauzko Didau antzerki faktoriaren eskutik dator. "Txikia nintzenetik gustatu izan zait", dio Ainhoa Agirrek, Didau antzerkia faktoriako kideak. "Gure izeba bat Ingalaterran bizi zen, Londresen. Gerra garaian joan zen, eta han geratu zen. Behin binilozko disko bat bidali zigun, Peter and the wolf, ingelesez. Nire aitak bazekien ingelesa eta txikiak ginela tokadiskoan jartzen zigun eta berak itzultzen zigun. Guretzat magikoa zen, mila aldiz entzungo genuen", gaineratu du. Orain dela urte gutxi batzuk izan zuen obra klasiko hau haur antzerki bihurtzeko ideia. "Amaren etxean ginen batean diskoa agertu zen. Juanmari (Alvarez, senarra eta Didauko beste erdia) antzezlan bezala moldatzea proposatu nion, baina bi lagun besterik ez gara eta, hainbat pertsonaiekin, nahiko zaila zen. Gure laboratorioan lanean hasi ginen eta gaur egungo obra den ideia sortu zitzaigun". Prokofieven obraren berezitasunetako bat da narratzaile bat dagoela. Baina, nola txertatu narratzailearen figura? "Gramofonoaren ideia izan genuen. Gu bi eskuluze gara eta lapurtutako gauzen artean gramofono bat eta disko bat daude. Diskoa jarri eta ipuina kontatzen doan eran, aurkituko ditugun gauzekin pertsonaiak eszenaratzen goaz". Musika klasikoa gaur eguneko haurrentzako arrotza izango da, ziur aski, baina ez dira horren beldur. "Ipuin honek haurrak harrapatzen ditu, barruan sartzen dira. Kontatzen dena gustatzen bazaie eta entzuten dena ona bada, berehala sartzen dira obran". Didau antzerki faktoria 2013. urtean sortu zuten Ainhoa Agirrek eta Juanma Alvarez cadiztarrak. "Sevillan bizi ginen eta han beste konpainia bat genuen: Titirimundi. Baina nik herrimina nuen eta semeak handitu zirenean Zarautzera itzultzea erabaki genuen. Titirimundi itxi eta Didau antzerki faktoria muntatu genuen. Enpresa txikia da, baina gu biontzako bakarrik denez, tamaina egokia du". Helduentzako obra bat muntatu dute (Vaya tela, doblando miserias, etxean bertan eskaintzen dituzten ikastaroetako ikasleekin), baina haurrentzakoak nahiago dituzte. "Haurrentzako istorioak asko gustatzen zaizkigu eta beraientzat antzerkiak egitea atsegina da. Beti dago erantzun bat: gustura edo aspertuta badaude beti erakutsiko dute". Beldartxo txikia izan zen beraien lehen haurrentzako antzezlana eta Peru eta otsoa da bigarrena. "Zer aurkituko duten haurrek? Otsoa! Baina otso dibertigarri bat. Umeek betidanik izan diote beldurra otsoari, eta ardura pixka batekin etortzen dira. Gero, gure otsoa ikusten dutenean, lasaitu egiten dira".