Eguraldi dotorea egokitu zaie aurtengoan Getariako San Prudentzio auzoko bizilagunei jaiez gozatzeko. San Prudentzio eguna asteartean izango da, hilaren 28an, baina asteburua aprobetxatu dute egitarau mardulena eskaintzeko, eta gaur eguerdian giro bikaina sortu da plazaren bueltan.
Protagonismoa, besteetan bezala, ekoizle txikien IV. Altza Porru azokak eduki du. Denetariko produktuak eskaini dituzte ilara luzean jarritako postuetan: gozokiak, gazta, garagardoa, barazkiak, xaboiak eta ukenduak, etxea dekoratzeko egurrezko nahiz beste hainbat materialetako produktuak, bitxiak, poltsak, landareak, loreontziak... Haien tartean, Gukak haurrentzako eskulan txokoa jarri du, eta txikienak gustura ibili dira tarte batez.
Karpa nagusian txosna egon da, eta pintxo galantak zerbitzatu dituzte. Zuzeneko musikaz gozatzeko aukera izan dute herritarrek han, Perejilek taldearen eskutik.
Gure Txeruko dantzari txikiek ere ez dute hitzordua galdu nahi izan, eta emanaldi polita eskaini dute.
Sos batzuk ateratzeko helburuz, auzo elkarteak otarra dotorea zozkatu du, eta zenbaki sariduna zein zen esan orduko agertu da irabazlea: Miren Galfarsoro zumaiarra. Asteartean beste otarra bat zozkatuko dela jakinarazi dute.
San Prudentzio egunez, asteartean, txistularien diana egongo da 10:30ean, eta meza nagusia, 11:00etan.