Artzape Euskaltzaleon Plazak hitzaldia antolatu du gaur arratsalderako. Zergatik eta zertarako Joxe Azurmendi izenburupean, Mikel Urdangarin eta Haritz Azurmendi filosofoak ariko dira solasean herritarrekin. "Zer ikasi behar genioke Joxe Azurmendiri gaur egungo garaia hobeto irakurtzeko? Nola begiratzen diote bi pentsalari gaztek Azurmendiren obrari?"... Azurmendiren pentsamendua eta ekarria aletuko dute bi filosofoek.
Saioa Zarautz jauregian izango da, 18:30ean, eta iazko udan zendu zen euskal idazle, filosofo, saiakera egile eta poeta izango dute hizpide. Azurmendik etikaren, politikaren, hizkuntzaren filosofiaren, teknikaren, euskal literaturaren eta, orokorrean, filosofiaren gaineko liburu eta artikulu asko argitaratu zituen, eta Udako Euskal Unibertsitatearen (UEU) sortzaileetako bat izan zen, halaber. EHUko Filosofia Modernoko katedraduna eta irakaslea izan zen, eta euskaltzain oso zen 2010etik.