Getariako Udalak, Getariako parrokiarekin eta Gipuzkoako Foru Aldundiarekin elkarlanean, Andre Maria amabirjinaren XIV. mendeko eskultura berreskuratu, eta parrokia barruan jarri du ikusgai, itsasoko atearen gainean.
Udalak ohar bidez azaldu duenez, irudia duela bost urte inguru azaldu zen Salbatore Deuna parrokiako txoko batean, eta 2022ko urtarrilean, Edorta Kortadi Donostiako Elizbarrutiaren Museoko zuzendariak eskultura ikuskatu eta aztertu zuen. Artearen Historian aditua da zuzendari hori, eta haren arabera, eskultura XIV. mendekoa da. "Kareharri grisezko eskultura bakarra da Gipuzkoan, Itziarren eta Irunen aurkitu direnak egurrezkoak baitira. Kortadiren iritziz, garrantzia eta balio historiko berezia duen pieza da, ziurrenik eliza eraiki zen garaikoa izango baita", azaldu du udalak.
Behin eskultura aztertuta, Kortadik eskulturaren "egoera kezkagarria" zela eta irudia garbitu eta zaharberritzeko lanak egitea iradoki zuen txosten batean, eta horren aurrean, "Getariako Udala eta aldundiko Ondare Historiko-artistikoaren arloa arduratu dira irudia aztertu, garbitu, babestu eta, orain, modu seguruan elizan jartzeaz".
Zaharberritze lanak zeregin horretan aditua den Carmen Martinek egin ditu.
