Indarkeria matxistei erantzuteko jarraibideak zehazteko lanketari ekin dio Getariako Udalak. Berdintasunaren aldeko eta indarkeria matxistaren aurkako zenbait ekimen gauzatu ditu udalak azken urteetan. Batetik, berdintasunaren diagnostikoa egiten hasi zen erakundea, eta 2022an, hurrengo lau urteetarako Berdintasun Plana idatzi zuen. Plan hori oinarri hartuta, hainbat lan garatu ditu erakundeak Emun aholkularitzaren laguntzarekin, eta horietako azkena izan da herrian gertatzen diren edo gerta daitezkeen indarkeria matxistei erantzun ahal izateko jarraibideak zehazteko lanketa.
Barne lanketa bat da abian jarri dutena, eta bertan gaian "ezinbestekoak" diren eragileak ari dira parte hartzen, hala nola departamendu, langile eta herri ordezkariak. "Aurreko astean, zirriborro baten inguruko lehen saioa egin zen udaletxean, eta pasa berri den astearteko Batzorde Informatiboan, indarkeria matxistei erantzuteko jarraibideen inguruko informazioak ere bere lekua izan berri du", azaldu du udalak.
Indarkeria matxista gertatzen denean jaso beharreko informazioaren nondik norakoak eta erasoa jasandako pertsonarekin izan beharreko harremanak zehaztu zituzten batetik, eta bestetik, erantzun publikoarekin eta erreparaziorako bideekin loturiko gaiak. Udalaren iritziz, "beharrezkoa eta ezinbestekoa" zen lanketa hori "herritarren zaintzari begira", eta hori hala ulertuta, erakundeak "era positiboan" baloratu du lanketa martxan jarri izana.
Salbatoreetarako, prest
Bestalde, Getariako Salbatore jaietan herriko tabernetan eta txosnagunean eraso matxisten aurrean nola jokatu jakiteko jarraibideak ipiniko dituzte herritarren eskura. Gainera, aurten lehen aldiz, udalak formazioa eskaini die tabernariei kontu horietan esperientzia eta jakintza duen Emagin elkarteak gidatu dituen saio batzuen bidez.
Udalak gogorarazi du Getarian "indarkeria matxistak ez duela lekurik", eta gaitz horrekin behin betikoz bukatzeko, eragileekin eta herritarrekin batera "lanean" jarraituko duela azpimarratu du.