Gure Txeru elkarteak antolatuta, Gizonezkoen XXVII. Salbatore Txapelketa hasiko dute maiatzaren 5ean. Aurten, gainera, berrikuntza gisa, finalak abuztuaren 3an jokatuko dituzte, igande arratsaldean. Orain arte Salbatore Egunean izan baitira, baina aurten emakumezkoen finalak jokatuko dituzte abuztuaren 6an. Hori horrela, mutilen izen-ematea zabalik egongo da apirilaren 25era arte.
Hiru mailatan sailkatu dira norgehiagokak, hala nola kadeteak (2009-2010), jubenilak (2007-2008) eta 23 urte azpikoak (2002ra bitarte, urte horretakoak barne). Klub bakoitzak nahi adina bikote aurkez ditzake txapelketara, eta izena ematerakoan, pilotariek zein urtekoak diren adierazi beharko dute. Parte hartzeko 688 86 38 60 (Xabier Etxaniz) zenbakira deitu edo etxanizgetaria@gmail.com helbidera idatzi daiteke.
Partidak astelehen, asteazken eta ostiraletan jokatuko dituzte, 18:30etik aurrera, Getariako frontoian, eta araudiaren arabera, kanporaketa bidez jokatuko dute lehiaketa. Partidaren eguna ziurtatu ostean, bikoteak azken orduko bajarik izanez gero, klubak berak bilatu beharko du ordezkoa, bikotea kanporatua izango da bestela. Ostean, titularrak edo ordezkoak jarraitu ahalko du.