Getariako Udalak jakinarazi du gaur 18:30ean topaketa irekia egingo dutela Zarautz jauregian, "Gaztetxearen inguruko prozesu publiko-komunitarioaren emaitzak aurkezteko eta hurrengo pausoak emateko". Gaztetxe berriari buruzko informazioa ere emango dute.
Lau hilabetez egin dute prozesua, eta gaurko topaketa herriko gazte eragileek eta udalak elkarlanean antolatu dute. "Iraila eta urtarrila bitartean lanketa bat egin da Getariako gazteen aisialdi ohituren ezagutzan sakontzeko eta gaztetxearen proiektuaren garapena lantzeko", azaldu du udalak. Herriko gazte eragileek eta udalak osatutako talde motore bat aritu da horretan, eta proiektuaren izaeraz, ekintza motez, edota parte-hartze espazioez hausnartu dute, "baita zenbait erabaki hartu ere".