Minbizia dutenei eta haien ingurukoei laguntzen dien elkartea da Iñurri, eta haren aldeko bertso saio musikatua, berriz, Tabuen kutxatik oholtzara ikuskizuna. Bertsoak eta musika uztartuz, herriz herri dabiltza hainbat bertsolari Iñurri elkartearentzat dirua biltzen, eta igande honetan Getarian egingo dute geldialdia.
Oholtzara Uxue Alberdi, Onintza Enbeita, Ane Labaka eta Oihana Iguaran bertsolariak igoko dira, eta musikaz Ixak Arruti eta Gari Otamendi arduratuko dira. Gaiak jartzeaz, berriz, Amaia Agirre bertsolaria.
Sarrerak eskuragarri daude, zortzi eurotan, Turismo Bulegoan. Lortutako diru guztia, esan bezala, Iñurri elkartearentzat izango da.