Getariako Udalak hogeita bigarrenez antolatu du Literatur Lehiaketa, eta dagoeneko parte hartzeko aukera zabalik dute LH3.mailatik gorako herritar guztiek. Ipuinak nahiz olerkiak aurkez ditzakete lehiaketara, eta partaideak zazpi multzotan banatuko dituzte, adinaren arabera. Hala, helduek ere eman dezakete izena lehiaketan.
Partaide bakoitzak nahi adina lan aurkez ditzakeela jakinarazi dute, eta mailak honakoak direla: LH3, LH4, LH5, LH6, 12-14 urte bitarteko gaztetxoak, 14-16 urte arteko gaztetxoak, eta azkenik, 16 urtetik gorakoak.
Parte hartzeko baldintzak ikusgai
Lanek jatorriz euskaraz idatzitakoak izan beharko dute, eta gaia librea izango da. Ohi bezala, lanek originalak izan behar dute, eta aurrez inon argitaratu gabeak.
Lanek gutxieneko neurri bat izan beharko dute, (ikus hemen oinarri guztiak), eta horiek aurkezteko epea martxoaren 21ean amaituko da, 20:00etan. Udal bulegoetan edo Udal Liburutegian entregatu behar dira idazlanak.
Bestalde, udalak jakinarazi du sariak noiz banatuko dituzten ere: apirilaren 24an egingo dute ekitaldia, 18:30ean.