Aurten ere zaldi gainean eta San Anton menditik barrena iritsi dira hiru Errege Magoak Getariako herrigunera. Puntualak izan dira, eta jarritako orduan, 18:30 aldera, herritarrek suzko ilarak ikusi dituzte mendian behera.
Ohiko ibilbidea egin dute. Moilatik Kale Nagusira igo dira Musika Bandaren laguntzarekin, eta handik errepide nagusia zeharkatu eta Elkanoren monumentuaren kanpoaldean gelditu dira, Herodesen pasartea antzezteko. Ondoren, udaletxe aurrean egin dute azken geldialdia, eta han, errege bakoitzak bertso bana abestu du Jaiotza bizidunaren aurrean. Jaiotzan Jesus haurraren paperean benetako haurra egon da: hiru hilabete bihar beteko dituen Enara, hain zuzen. Lasai-lasai egon da pasarteak iraun duen denbora tarte osoa.
Erregeek aurten ere goxoki mordoa banatu dute, eta aurreneko aldiz, Baltasar benetako pertsona beltz batek irudikatu duela azaldu dute antolatzaileek; jatorri senegaldarreko getariar batek.
Ilusioz gainezka gelditu dira umeak, bihar goizean eskatutako opari horiek irekitzeko zain-zain.