Poesia eta musika uztartzen dituen emanaldia da Belar hostoak, eta Txomin Artolak 1978an kaleratu zuen diskoa du oinarri. Artolak Walt Whitman poemagile estatubatuarrak idatzi zuen Leaves Of Grass olerki sortako hainbat lan euskaratu eta abesti bihurtu zituen, eta, orain, Dani Venegasek, Andoni Etxebestek, Antxon Sarasuak, Jon Gurrutxagak eta Urbil Artolak osatzen duten boskoteak bere erara moldatu ditu.
Musikariek Amaia Lasa ere izango dute alboan gaurkoan, Whitmanen inguruan arituko da olerkari getariarra hainbat testu errezitatzen. Parte hartze zabala izango duen ikuskizuna izango da, beraz, 19:30ean Iturzaeta aretoan hasiko dena. Azken sarrerak Turismo Bulegoan daude salgai bost euroan.