Azaroan estreinatu zen Getariako Iturzaeta aretoan Esperantzaren fruituak dokumentala, komunikabide hau parte den Urolako Komunikazio Taldeak Getariako Udalaren babesarekin egin duen ikus-entzunezkoa. Getariako Arraun Elkarteko traineru nagusiak aurten egin duen denboraldi bikaina jaso da lanean, baita klubaren ibilbidea bera ere. Hogeita sei herritarren testigantzak jasota, 90 minutuko lan mardula da, eta estreinaldian bete egin zen aretoa, 200 lagunetik gora bertaratu baitzen.
Astebetera, Erlo telebistan estreinatu zen, eta Getariako Udalaren webgunean eta webgune honetan ere eman zen.
Orain, berriz, udalak ikus-entzunezkoa USBan eskuratzeko aukera jarri du, norberak nahi duenean ikusi ahal izateko. 50 ale daude eskuragarri Harritarte dendan, eta bost euroko prezioa du bakoitzak.