Urtarrilaren 17a San Anton eguna izango da, eta pandemia tarteko, aurten ere ez da egitarau zabalik egongo. Udalak eta Alamedatik Habanerara bertso eskolak, dena den, urteroko bertso saioa antolatu dute, eta igande honetan, hilak 16, izango da emanaldia.
Sarreak dagoeneko salgai daude Turismo Bulegoan hamar euroan, eta gogorarazi dute edukiera muga egongo dela Balentziaga museoan egingo den bertso saioan. 18:30ean hasiko da emanaldia.
Uxune Areizaga getariarrak egingo ditu gai jartzaile lanak, eta sei bertsolari izango ditu aurrean: Saioa Alkaiza, Etxahun Lekue, Miren Artetxe, Danel Olano, Jone Uria eta Agin Laburu.
Bestelako ekitaldiak
Oraingoz, udalak ez du ekitaldi gehiagoren berri eman. Bestalde, urtero Mahasti Jauna izendatzeko ekitaldia egiten du Getariako Txakolina jatorri izenak San Anton egunez, baina hori noiz eta nola ospatuko den ere ez dute jakinarazi oraindik.