San Anton jaien bueltan, urtero punta-puntako pilota partida antolatzen dute Getariako Udalak eta Gure Txeru elkarteak Getarian, eta dena prest dute 2022 urte hasierarako. Urtarrilaren 9an, igandearekin, 17:00etan hasiko da kirol ikuskizuna Sahatsaga pilotalekuan.
Promozioko binakako txapelketako partidaz gozatuko dute ikusleek aurrena, Alberdi-Uriondok eta Zubizarreta III.a-Eskirozek jokatuko dutena, hain zuzen.
EPELen binakako txapelketako partida izango da ondoren, eta hor, berriz, Urrutikoetxea-Aranguren bikoteak Peña II.a-Albisu izango du aurrez aurre.
Sarrerak salgai daude herriko Turismo Bulegoan nahiz sarean, eta telefono zenbaki bat ere jarri dute zaleen eskura, edozein zalantza argitzeko nahiz informazio gehiago eskuratzeko: 943-82 04 06.