Asteak daramatza itxita Getariako berdura plazak, eta ostegun honetan itxura berrituta zabalduko ditu ateak, erliebedun horma irudi handi bat egin baitute bertan, udalaren enkarguz.
Berdura plaza toki soila da berez, espazio hutsa, alderik alde hormaren kontra eserlekua duena, goialdean leiho bakan batzuk, eta espazioaren erdialdean pare bat pilare. Orain burututako lanekin, plazaren itxura nabarmen hobetuko da, eta horrez gain, herriko historiaren parte bat islatuta geldituko da bertan.
Aurreneko mundubirari buruzko kontakizuna eskaintzen du horma irudiak, eta irekiera ekitaldian emango ditu udalak horri buruzko azalpenak. Hala ere, aurreratu dute bi ardatz dituela kontakizunak: "Amesten dugun mundua" deitu diote aurreneko ardatzari, eta "iraganaren aitortzatik etorkizun berri batera", bigarrenari.
Ostegun honetan izango da inaugurazioa, 18:30ean, herritarrentzat eta herriko taldeentzat. Dena den, goizetik egongo da espazioa herritarrei irekita.