Juan Sebastian Elkanori buruzko ekitaldi berria prestatu dute Getarian larunbat honetarako, ekainaren 5erako. Elkano battela, xumea baina gurea helduentzako kontakizun musikatua da, eta Elkanoren herrian bertan estreinatuko dute, 19:00etan, Iturzaeta aretoan. Sarrerak doakoak dira, eta Turismo Bulegoan eskuragarri daude atzotik.
Lana Koldo Ameztoi ipuin-kontalariak, Nerea Alberdi konpositoreak eta Kepa Elgoibar musikariak sortu dute, eta antolatzaileen esanetan, lehen mundu-bira "inspirazio-iturri" hartuta, "aniztasuna goresten du lanak". Ameztoik egingo ditu narratzaile lanak, eta Alberdik eta Elgoibarrek abestuko dute, baita zuzenean musika jo ere. Alberdik biolina, biola eta instrumentu txikiak txandakatuko ditu, eta Elgoibarrek akordeoia, gitarra eta perkusioa.
Ameztoik azaldu du ikuskizuna "aniztasunaren gorespen bat" dela. "Elkanoren ibilbidean topatu ditudan, baina hark inoiz entzun ez zituen kontakizun eta kondairen inguruan egituratzen den narrazio bat biltzen du. Konfinatuta egon garen garaian, aukera izan dut istorio horien bila mundu guztian zehar bidaiatzeko", gaineratu du.
Alberdik, berriz, kontakizuna lotu eta girotzen duen partitura garatu du "toki askotako herri-musikaren kutsuekin, Elkano igaro zen lekuetako kulturen folkloreetan zehar bidaia onirikora eramanez ikuslea". Elgoibarrek azaldu du, azkenik, musikak "betekizun bikoitza" daukala ikuskizunean: "Kontakizun bakoitzaren hasieran, ikusleak kultura haietara eramateko erabiliko dugu musika, eta gainerako momentuetan, berriz, bigarren planotik narrazioa aberasteko".
Itsasoari lotutako ondarea ezagutaraztea xede
Elkano Fundazioaren eta Euskal Kultur Erakundearen (EKE) arteko lankidetza hitzarmenaren bidez sortu dute proiektu hau, eta helburua da "Elkano eta lehen zirkumnabigazioa ezagutaraztea, literaturaren eta musikaren bitartez; baita garai hartako euskal testuinguru soziala, ekonomikoa
eta kulturala ezagutaraztea ere, hau da, itsasoari lotutako ondarea, euskal itsasbazterreko herriek partekatzen dutena".
Lana Getarian estreinatu ondoren Iparraldean aurkeztuko dute. Elkano Fundazioak azaldu du, gainera, lanean ari dela ikuskizuna Araba, Bizkai eta Gipuzkoako beste herri batzuetara zabaltzeko, "bereziki lehen mundu-birarekin lotura duten haietara".