Azken zazpi urteetan egin bezala, hurrengo urterako aurrekontuak osatzeko parte-hartze prozesua abiatu du Getariako Udalak. Guztiok 1! izeneko dinamikaren bidez, 2021era begirako "ideiak eta proposamenak luzatzeko" aukera izango dute getariarrek, urriaren 15era bitartean. Besteak beste, hirigintzaren, ingurumenaren, gizarte zerbitzuen , kulturaren nahiz kirolaren arloetan egin ditzakete proposamenak.
Prozesuan parte hartu nahi dutenek, bi modu dituzte ekarpenak helarazteko. Batetik, herriko postontzietan banatuko dituzten fitxak bete eta udaletxeko atariko gutunontzian utzi ditzakete. Bestetik, online erantzun ditzakete galdetegiak. Horretarako, fitxetako QR kodeak jasota izango duen helbidea erabil dezakete, edo udalaren web-orrialdean, Facebook kontuan nahiz Getaria Gertu aplikazioan izango dute eskuragai galdetegia.