Bart bi gazte atxilotu ditu Ertzaintzak Getarian, belar-denda batean lapurreta egitea leporatuta. Ertzaintzak ohar bidez jakinarazi du goizaldeko ordu biak aldera herritar baten abisua jaso dutela, ustezko lapurretaren berri emanaz. Dirudienez, lekukoak bi gizon belar-dendatik presaka irteten eta auto batean ihes egiten ikusi ditu.
Patruila batek ustez lapurreta egin ondoren ihes egiteko erabilitako autoa eta bertan zihoazen bi gazteak identifikatu ditu handik gutxira. Horietako batek atea behartzeko erramintak eta establezimendutik lapurtutako txanponak eta billeteak zeramatzan, Ertzaintzaren arabera. Kutxa erregistratzailea inguruan aurkitu dute. Ertzaintzak polizia-etxera eraman ditu bi gazteak, dagozkion eginbideak egin, eta epailearen aurrera eramateko.