Aita Mari errestake-ontziak joan den astean lortu zuen Espainiako Itsas Agintaritzaren baimena, Mediterraneo itsasoan laguntza humanitarioa eman ahal izateko. Uztailetik Pasaiako portuan egon da ontzia. Konponketa batzuk egiteko sartu ziren portuan, baina abuztuaren amaierarako eginak zituzten. Zain egon dira ordutik baimena noiz lortuko. Hasiera batean, asteazkenean itsasoratzekoa zen, baina eguraldia dela eta, Greziarako bidea beranduago hastea erabaki zuten arduradunek. Gaur abiatu dira, 10:30 inguruan.
Greziako errefuxiatuei laguntza humanitarioa emateko zortzi tona daramatza ontziak, arropa, manta eta higienerako produktuetan. Eta gauzak ondo bidean, hamar egun barru Sizialara iritsiko dira, eta, handik, beste lau egun beharko dituzte Lesbosera heltzeko eta laguntza banatzen hasteko.
Hamaika pertsonek osatzen dute Aita Mariko tripulazioa, eta, gaur, itsasoratu aurretik, agur-ekitaldi xume bat eskaini diete Pasaiako portuan.