Trikiti eta pandero doinuak, erromeriazaleak, mendizaleak, jaki gozoak eta edari freskoa nagusi izango dira datozen egun eta asteetan Zelatungo mendi lepoan. Iraila badator, eta harekin iritsiko dira aurten ere Hernioko tontorraren magaleko bi borden bueltan ospatzen dituzten erromeria jendetsuak.
Urteko bederatzigarren hilabetean, igandero izaten da festa Zelatunen, eta aurten ere hala izango da. Baina uda bukaerako eta udazken hasierako igandeak lotzen dituzten erromeriek abuztuan izan ohi dute aurrekaria, atarikoa, motorrak berotzeko eguna. Horrela, bihar ospatuko dute San Joan Txiki Zelatunen. Irailean ez bezala, borda bakoitzak bere festa antolatua du biharko: Itzederrek eta Lidiak jarriko diote musika Antonioren Bordakoari, eta Arandia Anaiek, Agirretxe bordakoari. Goiz-eguerdian hasi eta afal aurrera arte iraungo du festak bihar, tartean bazkaria dutela.
Lau erromeria
Eta San Joan Txikikoarekin batera eman dute jakitera Zelatungo bordek iraileko erromerien egitaraua ere.
Lau igande ditu aurten irailak, eta lau erromeria ospatuko dituzte Zelatunen: irailaren 7an, Enaitz eta Erkizi bikotearekin; 14an, Aitziber Arruabarrenarekin eta Aritz Erasunekin; 21ean, Ostolazarekin eta Larrañagarekin; eta 28an, Izerrekin eta Alabierrekin.
Antonioren Bordan aldaketak urte berriarekin
Aurtengoak izango dira iraileko azken festak Antonioren Bordako egungo arduradunentzat.
Izan ere, San Joan Txiki eguneko eta datorren hileko erromerien egitarauaren kartela baliatu dute haiek Zelatungo borda horretan osatu duten ibilbidea bukatzear dutela jakinarazteko eta bezeroei eskerrak emateko. Hamabost urteren ondoren, 2025aren bukaerarekin amaituko dute ibilbide hori Maria Jesus Etxeberriak eta haren sendiak.