Xanti Rodriguez zinemagilea film berri bat grabatzen hasiko da datozen asteetan, eta lanaren zati bat grabatzeko herritarren laguntza behar du. Abenduaren 23an, astelehenez, egingo du filmaren grabaketa Errezilgo plazan, eta grabazioan parte hartu nahi duten herritarrek castingerako izena eman beharko dute laura@xantirodriguez.com helbidera mezua idatzita. Mezu horretan izen-abizenak, telefono zenbakia eta eskatutako jantziekin ateratako bi argazki –atzealdetik eta aurrealdetik ateratako bana– bidali beharko dituzte herritarrek.
Jantzi zehatz batzuk eraman beharko dituzte herritarrek grabaketara –honako lotura honetan ikus daitezke jantzien proposamen batzuk–; izan ere, 1910. urtean girotutako grabaketa egingo dute abenduaren 23an. Jantzi zaharrak behar dituztela ohartarazi du zinema zuzendariak, eta figuranteak jantzien arabera aukeratuko dituzte. Castingerako izena emateko azken eguna azaroaren 30a, zapatua, izango da.