Abuztuaren 14an eta 15ean Europako Segalari Txapelketa jokatuko dute Austriako Schärding herrian, eta hainbat euskal segalari izango dira lehian. Euskal Herria ordezkatuko duen taldean hiru gaztetxok eta hamasei helduk parte hartuko dute; tartean da Jexux Mari Goenaga errezildarra.
Suitzako, Alemaniako, Hego Tirolgo, Esloveniako, Eslovakiako, Txekiako, Britainia Handiko, Austriako eta Euskal Herriko segalarik parte hartuko dute txapelketan. Euskal Herriko taldea 1997. urteaz geroztik ari da lehia horretan parte hartzen.
Txapelketan azkartasuna eta txukuntasuna hartuko dituzte kontuan, eta Goenagak nahiz gainerako gizonezko parte-hartzaileek 10x10 metroko lursailean egin beharko dituzte lanak. Txapelketaren aurreko edizioetan marka oso onak lortutakoak dira euskal segalariak; adibidez, 2017an bigarren postua lortu zuen Europako Txapelketan Jexux Mari Goenaga errezildarrak.