Bi txapel, bi azpeitiarren eskutik

Maialen Lujanbio. Izen hori du gaurkoan bertsolaritzak. BECeko publikoa erabat bereganatuta, hark irabazi du Bertsolari Txapelketa Nagusia, bigarren aldiz. Xebastian Lizasok jantzi dio txapela, besarkada estua bezain beroa eman ostean. 1986an Euskal Herriko txapela irabazi zuen Lizasok, eta Lujanbiori janztea tokatu zaio gaurkoan. Duela zortzi urte, berriz, Joxe Agirrek jantzi zion txapela Lujanbiori. Bi txapel, beraz, bi azpeitiarren eskutik jantzi ditu. Honela kantatu dio Lizasok Lujanbiori, txapela janzteko unean: "Txapelarekin goza ezazu ondorengo urteetan, txapelak ere gozatu dezan buru ahaltsu horretan". Hemen ikus daiteke une horretan Berriak grabatu duen bideoa: https://www.youtube.com/watch?time_continue=150&v=_mAPX865mS0 Finala amaitu ostean, hitz hauek esan ditu txapeldunak, Lizasori buruz, ETB1en egin dioten elkarrizketan: "Guretzat eredu izan da Xebastian, erreferente bat. Bertsolari eta lagun ona da, eta ilusioa egin dit txapela berak janzteak". Ez da eskualdea BECen presente egon den une bakarra izan txapela janzteko momentua. Izan ere, Unai Agirrek Errezil izan du gogoan amaierako agurreko bertsoan. Pankarta ere jarri diote errezildarrek animoak emateko. Lotura honetan entzun daiteke Agirreren agurreko bertsoa.