Errezilen ere ospatu dute Emakumearen Nazioarteko eguna; ekitaldi anitzekin, gainera. Esate baterako, 25 lagun inguru bildu ziren emakumeez osatutako mahai-inguruan atzo, igandea. Honako hizlariek parte hartu zuten saioan: Begoña Galarraga baserritarrak, Ana Elosegi psikologo eta hezkidetzan adituak, Izaro Zinkunegi kirolariak eta Nekane Zinkunegi bertsolari eta kazetariak. Ane Uzkudunek egin zituen moderatzaile lanak.
Ondoren, bertso-poteoa egin zuten herrian, eta Eneritz Artetxe eta Nekane Zinkunegi jardun ziren bertsotan. Haiei lagundu zieten Lorea Rudea eta Irati Urdalleta trikiti- eta pandero-joleek. Poteoaren ostean, 32 emakumek afari mokadua egin zuten.
Atzokoaz gain, ordea, ekitaldi ugari egin dituzte asteburuan Errezilen; haien artean, Ama, amona… Noiz arte zaintzen? hitzaldia, kartel lehiaketa, bideo emanaldia edota autodefentsa ikastaroa.