Gipuzkoako Foru Aldundiak Etorlur sozietate publikoaren bidez babes publikoko lau etxebizitza eraikitzeko asmoa du Beizaman. Etxebizitza horien inguruko informazioa emateko astearterako (martxoak 24) nahi duten herritar guztientzako bilera irekia antolatu du, 18:30ean, Beizamako Natur Eskolan.
Astearteko bilera horretan, Gipuzkoako Foru Aldundiko, Etorlurreko eta Beizamako Udaleko ordezkariek parte hartuko dute, eta honako kontuen inguruko informazioa aurkeztuko dute: Beizaman eraikiko diren etxebizitza tasatuen aurreproiektua, etxebizitza tasatuen udal ordenantza (gehieneko prezioak, eskuratzeko baldintzak, etxeak esleitzeko prozedura eta abar) eta etxebizitzak eraikitzeko lanen programazioa.
Beizaman eraikitzekoak diren babes ofizialeko lau etxebizitzen proiektua aldundiak landa inguruneak biziberritzeko helburuz egingo duenetako bat da Etorlur sozietate publikoaren bidez eta Beizamako Udalarekin eta Urkomerekin lankidetzan. Mila biztanle baino gutxiagoko udal eremuetan babes publikoko sustapenak bultzatzea helburu duen aldundiaren proiektuetako bat da Beizamakoa.