Bi urteko lanketa eta gero, Saiaz gizarte zerbitzuetako mankomunitateak joan den irailaren 30ean aurkeztu zuen lehen aldiz jendaurrean Indarkeria Matxistaren Kontrako protokoloa. Errezil, Beizama, Bidania-Goiatz eta Albiztur dira mankomunitatea osatzen duten lau udalerriak, eta Errezilen egin zuten lehen aurkezpen hura. Haren aurretik jakinarazi bezala, Saiazek herriz herri egingo ditu protokoloa gizarteratzeko aurkezpena.
Horrela, joan den ostiralean, urriaren 14an, Beizaman egin zuten protokoloa aurkezteko saioa. Udaletxe azpian, emakume zein gizon elkartu ziren aurkezpen saioan. Hain zuzen ere, "giro ederra" eta "gizonen parte hartze handia" dira Saiazekoek Beizamako aurkezpenaz nabarmendu dituztenak. Gainera, elkartutakoek gaiarekin lotutako proposamenak egin zituztela aipatu dute mankomunitateko ordezkariek, eta horiek jasota gelditu direla ere bai.