Ertzaintzak pertsona bat atxilotu zuen atzo, osteguna, Azpeitian, Gipuzkoako adinekoen zenbait etxebizitzatan eta egoitzatan bitxiak lapurtu dituelakoan. Era berean, beste bi pertsona ikertzen ari da Ertzaintza. Zenbait herritarrek lapurretengatik salaketak jarri ondoren abiatu zuen Urola Kostako ertzain etxeak ikerketa. Ertzainor Unitateko txakurren eta gidarien laguntzarekin, pertsona horiek bizi diren etxebizitza miatu zuten aurrena ertzainek, eta han lapurtutako zenbait bitxi eta dokumentu aurkitu ostean gauzatu zuten atxiloketa. Adineko pertsonen zaintzaile gisa etxebizitza partikularretan zein egoitzetan lan egiten duen 48 urteko emakumea da atxilotua.
Ertzaintzak jakinarazi duenez, zenbait bitxi eta erloju, gehienak urrezkoak, lapurtu zituen azken hilabeteetan emakume horrek, eta gero, bitxi horiek bere bikotekideari eta semeari — 61 eta 26 urtekoak, hurrenez hurren— ematen zizkien, urrearen eta bitxien salerosketa puntuetan sal zitzaten. Poliziak egindako kalkuluen arabera, salerosketa horien bidez, guztira, 11.000 euro baino gehiagoko irabaziak izan dituzte.
Emakumea lapurreten ustezko egilea delakoan atxilotu zuen Ertzaintzak. Gainera, konfiantzazko abusuagatik eta talde kriminal baten barruan dirua hartzeagatik eta zuritzegatik delituak "larriagotu" dizkiote hari. Haren bikotekideari eta bien semeari, berriz, eginbideak ireki dizkiote.
Atxilotutako emakumea poliziaren eskuetan utzi dute bidezko eginbideak egiteko, eta, prozesu hori amaitutakoan, epailearen aurrera eramango dute.