Gipuzkoako EHNE sindikatuak antolatuta, mendiko urei, kontagailuei eta ur horiek erabiltzeagatik Uraren Euskal Agentziak ezarri nahi duen kanonari buruzko bilera irekia egingo dute ostegunean, ekainak 4, Azpeitiko Lurgintzaren egoitzan. 18:30ean hasita, mendiko uren erabiltzaileei gertatzen ari denaren inguruko informazioa emango diete, eta alternatibak aurkitzen saiatuko dira.
Kontua da, Uraren Euskal Agentzia mendiko ura erabiltzen duten etxebizitzei kontrol eta baldintza berriak ezartzen hasi dela, uztailaren 20ko 1/2001 Legegintzaldiko Errege Dekretua eta Eusko Jaurlaritzaren 2017ko apirilaren 24ko agindua aplikatuz. Araudi horren arabera, mendiko ura erabiltzen duten etxeek eta baserriek hainbat betebehar dituzte: ur kontagailu indibidualak instalatzea eta mantentzea, kontsumoen irakurketak egitea eta Ura agentziari bidaltzea, uraren osasun kontrolak eta txostenak egitea, eta, gainera, uraren erabileragatik kanon bat ordaintzea.
EHNE eta hainbat baserritar irtenbide juridiko posibleak aztertzen ari dira, neurri horiek "gehiegizkoak" eta "bidegabeak" direla iritzita. Izan ere, gogorarazten dute mendiko iturrietatik ura etxeetara eramateko azpiegitura guztiak beraiek edo aurreko belaunaldiek egin dituztela urteetan zehar, inolako laguntza ekonomikorik gabe eta lan karga oro beren gain hartuz.
Naroa Irure Gipuzkoako EHNE sindikatuko koordinatzaileak azaldu duenez, Eusko Jaurlaritzaren araudiak aukera ematen du, zenbait kasutan, kontagailuen ordez beste sistema batzuk erabiltzeko. "Abokatuarekin aztertzen ari gara ea hortik tiraka zerbait egin daitekeen", azaldu du. Horregatik, puntu hori ere aztertuko dute osteguneko bileran. Herritar orok izango du bilerara bertaratzeko aukera.