Ene Kantak taldeak Bisonte mastodontearen bila ikuskizuna eskainiko du igandean, 17:00etan hasita, Soreasu antzokian, eta oraindik ere eros daitezke 2 urtetik gorako umeei zuzendutako emanaldirako sarrerak. Hamahiru eurotan eros daitezke horiek, Kulturaz.eus webgunean.
Bisonte mastondotearen bila ikuskizunaren azken emanaldia izango da Azpeitikoa, eta aurretik antzezlanak herriz herri izandako arrakasta nabarmendu du Ene Kantakek: "Azken hamalau hilabeteetan 40 emanaldi baino gehiago eskaini ditugu eta 30.000 sarreratik gora saldu".
Nerea Urbizuk idatzitako izen bereko liburuan oinarritutako haurrentzako antzerkia da Bisonte mastodontearen bila, eta musikak garrantzi handia du emanaldian. Alaitz Olaizola antzerkigile azpeitiarrak egina da ikuskizunaren gidoia, eta bira haren herrian bukatzea bezalakorik ez dagoela azaldu du Urbizuk.