Azpeitiko bi pilotariren arteko partida erabakigarria hartu zuen atzo Idiazabalgo (Gipuzkoa) Igarondo pilotalekuak: Julen Egiguren eta Unai Alberdi buruz buru, B serieko finalerdietarako txartelaren borrokan. Berez, Egigurenek aldeko zituen baldintzak, txartela bereganatzeko nahikoa baitzuen 16 tanto egitea; Alberdik, ostera, 22 egin beharra zeuzkan Egiguren 15etik pasatzerako. Baina Alberdi zailtasun guztiei aurre egiteko jarrera argiarekin atera zen aurreneko segundotik, eta hamasei pilotakada jotzerako 0-6 aurretik zen.
Ia ezer egiteko aukerarik ez zion utzi Egigureni, eta 176 pilotadaka eta hiru ordu laurden aski izan zitzaizkion herrikidea lehiatik kanpo lagatzeko. Horrela, 10-22 irabazita, Alberdirena da finalerdietako txartela, eta gainera A multzoko taldeburu gisa igaroko da fase horretara, Rekalderekin batera. B multzoan, berriz, Amianok ziurtatuta du hurrengo faserako pasea, eta bigarrena zein izango den ostiralean erabakiko da Iurretan (Bizkaia), Muruaren eta Zubizarreta III:aren arteko partidan. Hain zuzen ere, partida horretako irabazlearen kontra jokatu beharko du finalerdietako norgehiagoka Alberdik maiatzaren 15ean, Irungo (Gipuzkoa) Uranzu pilotalekuan.