Hasieran aurreikusitakoa baino beranduago (2025ean hastekoak ziren), datorren astelehenean hasiko dituzte Done Jakue kaleko topalekua atontzeko lanak.
2023ko azaroaren 22an Gernikako arbolaren kimua erori ondoren Frontoi Txikiaren eta jolas parkearen artean hutsik gelditu zen eremu hori Alde Zaharreko bizilagunentzat "topaleku eroso" bilakatzea erabaki zuen udalak eta, topaleku hori diseinatzeko, nolakoa izan behar zen erabakitzeko, parte hartze prozesu "berritzailea" sustatu zuen erakundeak, udaleko sail ezberdinen elkarlanean oinarrituta eta Done Jakueko eremu horren erabiltzaileen parte hartzearekin (Ilunpe pilota elkartea, Marea Urdina eta Alde Zaharreko bizilagunak, besteak beste), OinHerrik eta Hiritik At-ek lagunduta.
2024ko udazkenean gauzatu zuten partaidetza prozesua, eta urte bereko abenduan aurkeztu zuten emaitza: astelehenetik aurrera gauzatuko duten proiektua.
Eraldatzearen xehetasunak
2024 bukaeran aurreratu zuten moduan, "espazio libre baten aldeko hautua" egin dute Frontoi Txikiaren eta Done Jakueko haur parkearen arteko eremua eraldatzeko, "oztoporik gabekoa, multifuntzionala eta goxoa" izango den espazio bat.
Estalpe bat izango du guneak, Frontoi Txikiari itsatsita. Eremua bera "zertxobait handitu" egingo dute; aparkaleku batzuk kenduko dituzte, eta eserlekuak eta landareak jarri. Harmailak, ping pongeko mahai bat eta beste elementu batzuk ere jarriko dituzte, eta zorua "aldatu eta berdindu" egingo dute, "irisgarriagoa" izan dadin.
Astelehenean hasiko dituzten lanek 84.872 euroko aurrekontua dute eta bi hilabete eta erdian bukatzea aurreikusi du udalak.