Apirilaren 18an igeriketa egokituko Marea Urdina-Izarraitz Saria jokatuko dute Azpeitiko igerilekuan, hirugarren urtez jarraian. Federatu gabe dagoen orok parte hartu ahal izango du sariketaren lehenengo zatian, eta bigarrena, berriz, aniztasun funtzionala duten pertsonei zuzenduta egongo da. Izen eman daiteke dagoeneko honako esteka honetan, edota Marea Urdinaren webgunean.
Parte hartu nahi duten igerilariek 16:00etarako joan beharko dute igerilekura, orduan hasiko baitute beroketa saioa. 16:45ean federatu gabekoen txapelketa egingo dute, eta 17:00etan, berriz, aniztasun funtzionala duten pertsonak soilik lehiatuko dira.
Antolatzaileek nabarmendu dutenez, edonork parte har dezake txapelketan, edozein dela ere haren igeriketa maila. Parte hartzaileek aukeran izango dute 25 edo 50 metroko proba egitea.