Herriko txikienek Meltxor, Gaspar eta Baltasar Errege Magoen pajeekin elkartzeko aukera izan dute gaur, igandea. Udaletxe azpiko arkupeetan egon dira hiru Errege Magoen laguntzaileak 17:30etik aurrera, ordubetez. Haurrekin hitz egiteko eta haien eskariak bertatik bertara entzuteko aukera izan dute Erregeen mezulariek. Nola ez, umeen eskutitzak jaso eta zakuetan bildu dituzte gaur ere; trukean, gozokiak eman dizkiete erregeen laguntzaileek haurrei.
Errege Magoak bihar arratsaldean iritsiko dira herrira. Aurrena, Lasao bisitatuko dute Meltxorrek, Gasparrek eta Baltasarrek. 16:15 inguruan iritsiko dira hara, eta hango bizilagunak agurtu ondoren, txu-txu trena hartuko dute Azpeitira. 17:00ak aldean iritsiko dira haiek Soreasuko Sebastian Deunaren parrokiara, eta han bildutako herritarrak agurtuko dituzte orduan. Atseden labur bat hartuko dute, gero, desfilearen aurretik indarrak hartzeko. 19:00etan hasiko dute ibilbidea igerilekuaren parean, eta 20:00 inguruan amaituko dute udaletxean.