Ibaieder eta Urola ibaietako hainbat zubi inguru garbitzen ari da udala egun hauetan; hain justu, Amuko zubiaren, San Martin estrataren, Azoka Plazaren, Enparan dorretxearen ondoko zubiaren eta Julian Elorza kaleko zubiaren inguruetan ari dira lanean Basoinsa enpresako langileak. Astelehenean hasi zituzten garbiketa lanak, eta hiruzpalau egun beharko dituzte lanak bukatzeko, udalak aurreratu duenez.
Hiru helburu nagusirekin hasi da udala ibaietako zubi inguruak garbitzen: uholde arriskua murrizteko, ibaiertzeko landarediak betetzen duen funtzio ekologikoa zaintzeko nahiz landaredi inbaditzailea eta aloktonoa ezabatzeko.
Helburu horiek kontuan hartuta honako lanak egingo dituzte: bost metrotik beherako altuera duten zuhaitzak moztuko edota kenduko dituzte, bost metrotik gorako garaiera duten zuhaitzen azpialdeko adarrak kimatuko dituzte, egur hilak ibaitik aterako dituzte, sastrakak garbituko dituzte, eta landare inbaditzaileak eta aloktonoak kenduko dituzte.