Mende erdia beteko da Lagun Onaken gizonen lehen taldea lehen aldiz Espainiako Hirugarren Mailara igo zenetik. Hori dela eta, larunbat arratsaldean omenaldia egingo diete talde hartako jokalariak izan zirenei. Ez dute horretarako edozein egun hautatu; zapatuan Lagun Onakek Aretxabaletaren kontra neurtuko ditu indarrak 17:30ean hasita Garmendipen, eta duela 50 urte, Hirugarren Mailara lehen aldiz igo zirenean, final aurreko partida Aretxabaletaren kontra jokatu zuten. Beraz, egun aproposa izan litekeela iritzita, larunbaterako antolatu dute omenaldia.
Aitzakia horrekin, joan den larunbat goizean talde hartako kide izan zirenak Garmendipen elkartu ziren argazkia ateratzeko. Honakoak ageri dira argazki horretan: goian, ezkerretik eskuinera, Jose Ignacio Azpiazu, Jose Antonio Odriozola, Patxi Bastida, Luxio Aizpuru, Jose M. Bereziartua, Juan Luis Segurola, Javier Odriozola eta Miguel Olaizola; eta behean, ezkerretik eskuinera, Martxial Elorza, Esteban Telleria, Iñaki Arrieta, Javier Larrañaga, Santi Custodio eta Javier Nazabal.
Ekitaldi polita izango dela eta, taldearen zuzendaritzak herritarrei dei egin die larunbatean Garmendipera azaltzeko.
