Basoak, biodibertsitate ekoizleak izenburupean, basoei eta biodibertsitateari buruzko lehendabiziko jardunaldiak egin dituzte Azpeitian. Urola Bizirikek, Lurgaiak eta Kutxa fundazioak elkarlanean antolatu dituzte jardunaldiak, eta horiek adierazi dutenez, gonbidatu duten aditu taldeak, besteak beste, "engainuzko terminoak interpretatzen" lagundu die herritarrei, "hala nola abandonua, mendiaren garbitasuna edota sute arriskua".
Basoen eta biodibertsitatearen esparruan izen handiko adituak eta profesionalak izan ziren atzo Azpeitian: Arturo Elosegi eta Unai Sertutxa EHUko irakasleak, Phill Martin eta Isa Donoso BC3 Basque Centre for Climate Change zentroko kideak, Oscar Schwendtner Bioma Forestal enpresaren zuzendaria, Alfredo Ojanguren Oviedoko Unibertsitateko irakaslea eta abar. Horien guztien hitzaldiak izan ziren atzo, Azoka Plazako lehen solairuko aretoan, 09:15ean hasi eta iluntzera bitartean; azken jarduera 17:45ean hasita egin zuten mahai ingurua izan zen.
Gaur, berriz, 09:30ean hasita, interpretazio ibilaldi bat egingo dute Altzolarats errekari jarraituz, eta "paisaiaren irakurketa zorrotza eginez".
(Argazkiak: Oier Arregi eta Gorka Eizagirre)