Kulturaz kultur kooperatibak bihar, astelehena, zabalduko du Arkupehotsak egitasmoaren zortzigarren edizioan izena emateko epea. Musikari berriei beren ibilbidean urratsak egiteko aukera ematea du helburu proiektu horrek, eta urtarrilaren 18ra bitartean eman ahalko da izena.
Kulturazek 2018an jarri zuen martxan Arkupehotsak, eta ordutik, honako hauek izan dira proiektuaren lan ildo nagusiak: musika eta soinuaren inguruan sortzea, ikastea eta hori plazaratzea. Hori horrela, deialdian aurkeztu eta hautatuak izaten diren taldeek hainbat laguntza jasoko dituzte beren sormen prozesua garatu ahal izateko. Hasteko, Dinamoa sormen guneko Soinuaren Eremua erabiltzeko aukera izango dute, bertan entseatu eta zuzenekoa prestatzeko. Horrez gain, martxoaren 14a taldeen arteko topaketa eguna izango da. Taldeek elkar ezagutu eta jakintzak elkarbanatzeko aukera izateaz gain, bi formakuntza saio jasoko dituzte: artistikoa eta teknikoa. Saio horiek izaera praktikoa izango dute. Saio teknikoa, esate baterako, musika talde profesional baten soinu proban bertan gauzatuko da, zuzenean. Bestalde, tailer artistikoan gazteek formakuntza jasotzearekin batera, sortzen ari diren abestien inguruko aholkularitza jasoko dute.
Zuzenekoa, grabazioa eta talde irabazlea
Horrez gain, urtero bezala, proiektuan parte hartu duten taldeek emanaldi kolektiboa eskainiko dute; 2026ko ekainaren 13an izango da edizio honetako zuzenekoa. Alabaina, aurten, pauso bat aurrera eman nahi izan du Kulturazek, eta taldeak "Arkupehotsak izenaren jatorrian dagoen arkupetik harago" iritsiko dira: musikak herriko kaleak hartuko ditu. Hala, orain arte Sanagustin kulturgunean eskaini izan ohi den zuzeneko emanaldia Azpeitiko plaza nagusira eramango dute 2026an. Horrek espazio zabalagoa eta ikus-entzule gehiagorengana heltzeko aukera eskainiko du. Talde edo bakarlari bakoitzak, gainera, 300 euro jasoko ditu zuzeneko kontzertuaren truke, baita bere zuzenekoaren audio grabaketa profesionala egiteko aukera ere. Grabazio horretatik abiatuta, parte hartzaile bakoitzak bere gustuko abestiaren nahasketa jasoko du, etorkizunerako material baliagarri gisa. Era berean, Arkupehotsak egitasmoak talde irabazle bat izango du, eta horrek Sanagustin kulturguneko oholtza nagusia musika talde ezagunago batekin partekatzeko aukera izango du.
Informazio gehiago nahi duenak edo proiektuan izena eman nahi duenak Kulturazen webgunera jo dezake.