Urteko Kirol Sariak abenduaren 19an banatuko ditu Azpeitiko Udalak, Kirol Mahaiarekin lankidetzan. Orain, herritarrek sarietarako hautagaiak proposatzeko epea zabaldu du erakundeak, eta epe hori abenduaren 8ra bitartekoa izango da.
Hiru sari banatuko dituzte Kirol Sarietan: Urteko Kirolaria gizonetan eta emakumeetan eta Urteko Boluntarioa saria (norbanakoa edota taldea). Hiru sari horietarako proposamenak egiteko honako galdetegia bete beharko da.
Behin proposamenak jasotzeko epea bukatutakoan, hautagaiekin zerrenda bat osatuko du udalak, eta segidan, herritarrek botoa emateko epea irekiko du, abenduaren 10etik 15era bitartean. Herritarrek bi modu izango dituzte botoa emateko: igerilekuan eta kiroldegian jarriko diren postontzien bidez edota udalaren webgunean (Azpeitia.eus) jarriko den galdetegia beteta.
Abenduaren 19an, sari banaketa
Aurreko urtean bezala, aurten ere, Kirol Sariak banatzeko ekitaldia ostiral arratsaldez egingo dute. Abenduaren 19an izango da saio hori, 19:00etan, Sanagustin kulturgunean.
Azpeitiko Udala 2000. urtean hasi zen Kirol Sariak banatzen, eta COVIDagatik 2020. urtean ez zen saririk eman, baina bai beste urte guztietan.