Berrikuntzekin dator aurten ere Azpeitiko Erremonte Txapelketa. 24. aldia izango du aurtengoa txapelketak eta, 2024an bezala, bi jardunaldi izango ditu, finalaurrekoena eta finalarena. Baina ostiral iluntzeetako hitzorduak alde batera utzita, lehen aldiz, igande eguerdian jokatuko dituzte bi jaialdiak Izarraitz pilotalekuan.
Hain zuzen ere, datorren igandean, azaroaren 30ean, finalaurrekoak, eta abenduaren 7an finala jokatuko dituzte. Bi jaialdiak 12:00etan hasiko dira eta sarrera doan izango da. Oriamendi 2010 enpresako pilotariak ariko dira aurtengoan: Aiestaran VII.a-Juanenea eta Goikoetxea V.a-Larrañaga lehiatuko dira lehen finalaurrekoan; eta Ansa II.a-Eskudero eta Ezkurra II.a-Aiestaran VI.a, bigarrenean. Finalaurrekoetako bi irabazleek neurtuko dituzte indarrak abenduaren 7ko finalean, eta aurrerago zehaztuko dute beste partida "berezi" batekin borobilduko dute bigarren eta azken jaialdi hori.
Atzo arratsaldean aurkeztu zuten 2025eko Azpeitiko Erremonte Txapelketa udaletxean. Parte hartuko duten zortzi erremontistetatik bost –Eskudero, Larrañaga, Aiestaran VI.a, Ansa eta Aiestaran VII.a– izan ziren aurkezpenean, baina antolatzaileek eta babesleek hartu zuten hitza: Ion Oteiza udaleko Kirol batzordeburuak, Xabier Gonzalez Oriamendi 2010eko gerenteak eta Epi kristaldegiko Carlos Larrañagak.
Ikusleei deia
Jaialdiak egunez eta orduz aldatzearen erabakiari dagokionez, helburua "jendea frontoira joatea" dela berretsi zuten Oteizak eta Gonzalezek. Sarrera debalde izango da, gainera, eta Izarraitzera eta erremonteaz gozatzera joatera "animatu" zituzten herritarrak. Gonzalezen hitzetan, "ez dago aitzakiarik frontoira ez joateko".
Oriamendi 2010 enpresak 2026a izango du azken urtea erremontean, eta modalitatearen etorkizuna bera airean dago, ondorioz. Hala ere, Gonzalez baikor agertu zen atzo. "Oriamendik ez du jarraituko, baina egitura eta pilotariak hor daude", esan zuen. Pilotariek duela aste batzuk egin bezala, pilota erakundeen teilatuan dagoela nabarmendu zuen Oriamendiko gerenteak. Hain zuzen ere, Eusko Jaurlaritza enpresarekin harremanetan jarri dela jakinarazi zuen Oriamendi 2010eko gerenteak, eta otsailean berriro hitz egitekoak direla aurreratu zuen. Ezer zehatzik ez dagoela azpimarratuta, Jaurlaritzaren aldetik jarrera ona sumatu dutela esan zuen atzo Oriamendikoak: "Urtebete daukate erremontearekin zer egin nahi duten antolatzeko. Notizia onena da baikorrak direla erremontearen etorkizunari dagokionez".
Aurretik, sarrerakoan, Azpeitia erremontista askoren sehaska izan dela eta "berriak ere" sortzea nahiko lukeela esan zuen Kirol batzordeburuak. "Erakunde den aldetik" Azpeitiko Udalari ere "bere aletxoa jartzea dagokiola" adierazi zuen Oteizak, erremontearen "etorkizuna bermatzeko". Larrañagak, bere aldetik, Azpeitiko Erremonte Txapelketa martxan jarri zutenetik "lehen aldiz egongo ez den" beren aita ekarri zuen gogora, Epifanio Epi Larrañaga zena, "erremontezale amorratua" eta txapelketaren babeslea, hasieratik. "Haren eredua jarraituz", beren enpresak "ahal duen bitartean" txapelketa eta erremontea babesten jarraituko duela esan zuen Larrañagak.