Denboran galdu diren instrumentuak jotzeko gai den musikari bakanetako bat da Abraham Cupeiro galiziarra, eta abenduaren 14an Ahaztutako soinuak emanaldia aurkeztuko du hainbat artistarekin batera. 18:00etan hasiko da ikuskizuna Soreasu antzokian, eta sarrerak salgai daude jada Kulturaz kooperatibaren webgunean, 18 euroren truk.
Musika tresnen egilea da Abraham Cupeiro, eta haize-instrumentu ugari jotzen ditu, baina ezaguna da, oroz gain, aspaldi galdu diren instrumentuak berreskuratzeagatik, hala nola, Burdin Aroko Karnyx tronpeta eta Galiziako corna. Soreasura, beraz, iraganeko doinuak ekarriko ditu, baina ez da bakarrik egongo oholtzan: Oreka TX taldea, Agus Barandiaran (Korrontzi) eta Eñaut Elorrieta emanaldia euskal doinuez edertzeaz arduratuko dira, eta Oiasso Kamerata, berriz, kontzertuari euskarri melodiko eta erritmiko bat emateaz.
Musikari horien guztien batura izango da Ahaztutako soinuak, denboran zeharreko bidaia bat proposatzen duen emanaldia: garai bateko instrumentuak orkestra moderno batekin nahastuko dituzte Soreasun, sortuak izan ziren testuingurutik aldenduz.
Abraham Cupeirok tronpeta ikasi zuen Madrilgo Goi Mailako Musika Kontserbatorioan, eta, ondoren, Antzinako Musikaren Interpretazio masterra egin zuen Bartzelonako Unibertsitate Autonomoan. Bere formakuntza musika klasikoari lotuta badago ere, musika mota guztiek erakarri izan dute beti: hala, txikitatik, folk, jazz, antzinako musika eta beste hainbat motatako taldeetan aritu izan da. Horrez gain, berrehun instrumentutik gorako bilduma osatu du, eta hiru disko ere grabatu ditu.