Atleta azpeitiarrek lan aipagarria egin zuten atzo Donostian. Gipuzkoako hiriburuko maratoia eta 10 kilometroko lasterketa jokatu zituzten, eta Xabat Manzisidor eta Maite Etxezarreta podiumera igo ziren.
Maite Arraiza donostiarrak (2.44.59) eta Thomas Hollidayk (2.22.34) irabazi zuten maratoia, baina proba horren barruan jokatu zituzten, era berean, Euskadiko eta Gipuzkoako maratoi txapelketak, eta bietan zilarrezko domina irabazi zuen Manzisidorrek. Jose Antonio Gomez de Arribak jantzi zituen bi txapelak: bosgarrena izan zen Irungoa (2.24.41) sailkapen nagusian, eta bederatzigarren postuan helmugaratu zen azpeitiarra, 2 minutu eta 13 segundora (2.26.54).
Maratoiaz gain, 10 kilometroko lasterketa ere jokatu zuten atzo goizean Donostian, eta bigarren postuan sailkatu zen Maite Etxezarreta. Laurine Avinio frantziarrak bakarrik hartu zion aurrera azpeitiarri; 35 minutu eta 10 segundo behar izan zituen irabazleak hamar kilometroak osatzeko, eta 18 segundo gehiago, berriz, Etxezarretak.