Baigera jubilatuen eta pentsiodunen elkarteak 90 urteko herritarrak omenduta bukatu du gaur Jubilatuen Astea. Joan den astelehenetik hamaika ekintza egin dituzte herrian eta herritik kanpo, besteak beste, Matazak irteera, Euskal Burdinbidearen Museora bisita, bingoa, hitzaldia eta mendi irteera. Gaur, berriz, Jubilatuen Eguna ospatu dute, goizean meza izan dute Baigerako hildako bazkideen alde. Ondoren, 90 urteko herritarrak omentzeko bazkaria egin dute Azoka Plazan. 35 herritar dira 90 urte dituztenak eta omenaldian hamazazpik parte hartu dute. Nagore Alkorta alkateak eta EH Bilduko nahiz EAJko hainbat zinegotzik ere parte hartu dute omenaldiko bazkarian.