Mari Tere Garmendia hil da, Azpeitiko Ikastolaren sorrerako andereñoa. 80 urterekin zendu da azpeitiarra, eta bihar izango da haren hileta-elizkizuna Donostian bertan, han bizi baitzen duela hainbat urtetatik. 1965-66 ikasturtean, Azpeitiko Ikastola sortu zutenean, Garmendia eta Kontxu Odriozola izan ziren lehen andereñoak.
Uztarria Kultur Koordinakundeak 2006an ohorezko bazkide izendatu zituen Garmendia eta Odriozola zena –2016an hil zen–, Azpeitiko Ikastolaren sorrerako andereñoak izan zirelako. 2015ean, berriz, San Inazio jaien hasierako txupinazoa bota zuen gonbidatuetako bat izan zen Garmendia; izan ere, Azpeitiko Ikastolaren 50. urtemuga tarteko, sorrerako hainbat ikasle, irakasle eta guraso arduratu ziren jaien hasierako suziria botatzeaz.
Honako lotura honetan eskuragarri dagoen PDFan irakur daiteke 2008ko urriko Uztarria aldizkarian Mari Tere Garmendiari egindako elkarrizketa.