Hasi dira Arana kaleko 9. eta 17. zenbakien arteko espaloia berritzeko lanekin. Atzo aritu ziren ingurua obretarako prestatzen, eta Art eraikuntza enpresakoak dagoeneko hasi dira lanean.
Prat kafetegiaren pareko espaloia da berrituko dutena, eta lanak bi hilabeteko epean bukatzea aurreikusten du udalak. Obrek irauten duen bitartean espaloiaren ondoko erreia itxita egongo da, eta beraz, ibilgailuek norantza batean soilik igaro ahal izango dute Arana kaletik.
Hain zuzen ere, Aranatik 1766ko Matxinada kalera edota Olazko Andre Mariaren plaza atzera zein scalextric-era joan ahalko dute ibilgailuek, baina Bustintzuriko Errebaletik edota Olazko Andre Mariaren plazatik behera doazenek ezingo dute Aranako zati horretatik igaro; Arana Goikotik behera edo 1766ko Matxinadatik joan beharko dute.