Ardi gazta eskuz nola egiten den ikasteko eta praktikan jartzeko aukera izan zuten atzo hainbat haurrek Azpeitiko Komuntzo baserriko Sakona etxaldean, Ekoetxeak familientzat antolatutako Egin zure gazta esperientziaren barruan.
Sakona etxaldean barru eta kanpo bisita egiteko aukera izan zuten familiek, eta gainera, gazta txiki bana egin ahal izan zuten bisitan parte hartu zuten umeek. "Prozesu naturala ezagutu dute, esnea etxalde arduratsuetan lortzen denetik gazta bihurtzen den arte, jasangarriak eta naturarekiko errespetuzkoak diren praktikak sustatuz. Gainera, amaitzean, familia bakoitzak bere gazta etxera eramateko parada izan du", azaldu dute Ekoetxeko arduradunek.
(Argazkiak: Azpeitiko Ekoetxea)